ევროპის რეკონსტრუქციისა და განვითრების ბანკის (EBRD) ფინანსური მხარდაჭერით მიმდინარე წიაღის სექტორის რეფორმის პირველი ფაზის ფარგლებში შემუშავებული წიაღის სექტორის სტრატეგია საქართველოს მთავრობამ დღევანდელ სხდომაზე დაამტკიცა. 

წიაღის სექტორის სტრატეგიით განსაზღვრულია სახელმწიფოს პრიორიტეტები სამთომოპოვებითი მიმართულებით, რომელიც ხელს შეუწყობს სასარგებლო წიაღისეულის რესურსების განვითარებას საბაზრო პრინციპებზე დაყრდნობით.  

აღნიშნული სტრატეგია წარმოადგენს წიაღის სექტორის პირველად სახელმძღვანელო დოკუმენტს, რომლის საფუძველზეც განახლდება არსებული საკანონმდებლო ჩარჩო და საჭიროების შესაბამისად, შემუშავდება ქვე-სექტორული სტრატეგიის დოკუმენტები. 

აღნიშნული სტრატეგიის შემუშავებამდე არ არსებობდა კონცეპტუალური დოკუმენტი, რომელიც მოიცავდა ისეთ მნიშვნელოვან მიმართულებებს, როგორებიცაა მიწათსარგებლობის,  შრომის, გარემოსდაცვითი და სოციალური ზეგავლენის საკითხები.

წიაღის სექტორის სტრატეგიის არსებობა დაეხმარება საქართველოს მთავრობას სექტორის სწორი მიმართულებით განვითარებაში, სადაც გათვალისწინებული იქნება ადგილობრივი მოსახლეობის ინტერესები, გაუმჯობესდება შემოსავლების მართვა და საქართველოს მოსახლეობა მიიღებს მაქსიმალურ სარგებელს გრძელვადიან პერსპექტივაში

•  სექტორში სოციალური პასუხიმგებლობის მაღალი სტანდარტის დანერგვა , რათა წიაღის მოპოვების პარალელურად ადგილობრივმა მოსახლეობამ მიიღოს სარგებელი მათი რეალური საჭიროებების გათვალისწინებით. ინიციატივა აგრეთვე სასარგებლოა კერძო სექტორისთვის, საზოგადოებაში მათი პროფილის გაუმჯობესების კუთხით, ასევე აღნიშნული სისტემა ინვესტორისთვის შექმნის პროგნოზირებად ბიზნესგარემოს.
• რესურსების მართვის პროცესში დამატებითი ღირებულების შექმნის ხელშეწყობა - ჩვენი მიზანია რესურსების ეფექტიანი მართვა, რაც გულისხმობს წიაღისეულის საქართველოს ტერიტორიაზე გადამუშავების ხელშეწყობას. ამ მიდგომის მიზანია ქვეყანაში წიაღის სასაქონლო პროდუქტებით დამატებითი ღირებულების შექმნა, რაც პირდაპირ კავშირშია დამატებით სამუშაო ადგილებთან და საბოლოო ჯამში, ეკონომიკურ ზრდასთან. 
• ინვესტორებისთვის ხელსაყრელი ბიზნეს გარემოს შექმნა, კერძოდ, რესურსების მართვის პროცესში „ერთი სარკმლის“ პრინციპისა და ინტეგრირებული სალიცენზიო სისტემის დანერგვა. რაც საშუალებას იძლევა წიაღის მოპოვების უფლების მინიჭებასთან ერთად ინვესტორმა გამარტივებული წესით მიიღოს ყველა საჭირო სანებართვო დოკუმენტი.

 წიაღის სექტორის სტრატეგია